Qeyri-adi nağıllar

Yazıçı Edqar Allan Ponun ruhu qarğa cildinə girərək vəfat etmiş həyat yoldaşı Virciniyanın qəbri üstünə gəlir. Burada o, canını almağa gələn Əzrayılla üz-üzə qalır. Öz gedişini bir qədər təxirə salmaq istəyən yazıçı qorxunc qonağına qələmə aldığı qəribə hekayələri danışmağa başlayır.

Bu söhbət sayəsində Po dirilər dünyasında bir az da qalmaq üçün vaxt qazanır. Ekran əsərində müəllifin «Aşerlər evinin süqutu», «Qırmızı ölümün maskası», «Xəbərçi ürək», «Quyu və kəfgir» və cənab Valdemarla bağlı məşhur beş novellasının fərqli vizual təcəssümü yer alır. İlk baxışdan müstəqil görünən bu əhvalatlar daxilən bir-birinə bağlıdır.

«Qeyri-adi nağıllar» tammetrajlı animasiya filmi 2015-ci ildə rejissor Raul Qarsia tərəfindən lentə alınıb. Layihə ABŞ, İspaniya, Almaniya, Fransa, Belçika və Lüksemburqun birgə istehsalıdır. Səsləndirmədə Kristofer Li, Bela Luqoşi, Culian Sends və Qilyermo del Toro iştirak ediblər.