Cencoroll

Şəhər səmasında açılan dəlikdən qəfil enən nəhəng bir bədheybət binalardan birinin damına yerləşir. Sakinlər vahimə içində qaçışarkən hərbçilər yadplanetliyə qarşı silahlı müqavimətə hazırlaşırlar. Cəsur və maraq dolu Yuki isə heç kimin bilmədiyi bir sirrə bələddir: onun dostu Tetsu telepatik bağa sahib olduğu qəribə və sevimli bir məxluqu gizlicə saxlayır.

Çox keçmədən şəhəri qorxuya salan nəhəng canavarın əsl sahibi də peyda olur. Həmin şəxs Tetsunun qeyri-adi varlığını nəyin bahasına olursa-olsun ələ keçirmək niyyətindədir və bu da iki tərəf arasında qarşıdurmaya səbəb olur.

Qısametrajlı fantastik döyüş filmi olan «Cencoroll» animesi 2009-cu ildə Yaponiyanın «Think Corporation» studiyasında çəkilib. Eyniadlı franşizaya aid olan bu ekran işinin rejissoru Atsuya Uki, əsas rolları səsləndirənlər isə Hiro Shimono, Kana Hanazawa, Ryohei Kimura və Satomi Moriyadır.