All You Need Is Kill

Gələcəyin Yaponiyası qorxunc bir təhlükə ilə üzləşir: planetdə peyda olan "Darol" adlı nəhəng yadplanetli bitki qəflətən oyanır. Ondan törəyən dəhşətli məxluqlar insanları kütləvi şəkildə qırmağa başlayırlar. Bu fəlakətin mərkəzində qalan Rita adlı gənc qız hücum zamanı həyatını itirir, lakin dərhal sonra həmin günün səhərində diri şəkildə oyanır.

Sonsuz zaman dövrəsinə düşdüyünü anlayan Rita eyni günü və amansız ölümü təkrar-təkrar yaşamaq məcburiyyətində qalır. O, çıxış yolu axtararkən Keydzi adlı bir gənclə qarşılaşır. Məlum olur ki, Keydzi də eynilə onun kimi bu tükənməz zaman tələsində ilişib qalıb.

"All You Need Is Kill" tammetrajlı fantastik döyüş animesi 2025-ci ildə Yaponiyada istehsal olunub. Ekran əsərinin quruluşçu rejissorları Kenichiro Akimoto və Yukinori Nakamuradır. Əsas obrazları Ai Mikami, Natsuki Hanae, Mo Chugakusei və Kana Hanazawa səsləndiriblər.