Ozuma

Qlobal fəlakətlərdən sonra Yer kürəsi nəhəng qum səhrasına çevrilib və sağ qalan insanlar fərqli təbəqələrə bölünüb. Genetik cəhətdən dəyişdirilmiş hərbçilər qorunan qala-şəhərlərdə yaşayır, digər insanlar isə vahalarda və qum gəmilərində həyat mübarizəsi aparır. «Baldanos» ticarət gəmisinin gənc dənizçisi Sem Koyn qardaşını məhv etmiş nəhəng qum balinası Ozumanı axtarır. Növbəti səfərlərin birində o, hərbçilərdən qaçan sirli Maya adlı qızı xilas edərək gəmiyə gətirir.

Mayanın gəmiyə gəlişi heyəti Tezey qübbə-şəhərinin ordusu ilə qarşı-qarşıya qoyur. Təqiblər davam etdikcə bu qızın adi biri olmadığı və bəşəriyyətin gələcəyini dəyişə biləcək mühüm sirləri saxladığı üzə çıxır. Hər iki tərəfin nümayəndələri tədricən anlayırlar ki, qum dənizlərinin sirli varlıqları təkcə təhlükə deyil, bəşəriyyətin xilası ilə bağlı gizli həqiqətlərin açarıdır.

«Ozuma» fantastik anime serialı 2012-ci ildə Yaponiyada istehsal olunub. Cəmi 6 seriyadan ibarət bu layihə LandQ studios və Gonzo studiyalarının birgə işidir. Rejissor kürsüsündə Takahiro İkezoe və Ryosuke Takahashi əyləşib, əsas obrazları isə Tetsuya Kakihara, Atsuko Tanaka, Rie Tanaka və Sho Hayami səsləndirib.