Soukyuu no Fafner: Dead Aggressor

Festum adlı yadplanetli varlıqların hücumu nəticəsində bəşəriyyətin böyük hissəsi məhv edilmişdir. Sağ qalan insanlar hər şeyi vahid varlığa çevirmək istəyən bu canlılara qarşı müqavimət göstərirlər. Yaponiyanın ucqar Tatsumiya adasında isə xüsusi texnologiyalar vasitəsilə illərlə gizlənmək mümkün olmuş və gənclər xarici dünyada gedən müharibədən xəbərsiz böyümüşdür.

Nəhayət adanın gizli müdafiə sipəri qırılır və düşmənlər bu sonuncu sığınacağa hücum edir. Belə şəraitdə mübarizə yükü yeniyetmələrin üzərinə düşür, çünki adada aparılmış genetik tədqiqatlar yalnız onlara Fafnir adlanan nəhəng döyüş robotlarını idarə etməyə imkan verir.

«Soukyuu no Fafner: Dead Aggressor» anime serialı 2004-cü ildə Yaponiyanın Xebec studiyası tərəfindən istehsal edilmişdir və 25 epizoddan ibarətdir. Ekran əsərinin quruluşçu rejissorları Akihiro Enomoto və Naoki Hisikavadır, əsas rolları isə Makoto İşii, Kohey Kiyasu, Marika Matsumoto və Ryoko Şiraişi səsləndirmişdir.