Utancaq [TV-1]

XXI əsrin ortalarında dünyanın müxtəlif yerlərində insanları qorumaq və əmin-amanlığı təmin etmək üçün fövqəltəbii güclərə malik xilaskarlar meydana çıxır. Yaponiyada bu missiya Teru Momiciyama adlı 14 yaşlı məktəbli qıza həvalə olunur. Hədsiz utancaq və sıxılqan xarakterə malik olan bu yeniyetmə xalq arasında Shy, yəni Utancaq ləqəbi ilə tanınır.

Baş qəhrəman daxili çətinliklərinə və həyəcanına qalib gələrək öz bacarıqlarından bəşəriyyətin xeyrinə istifadə etməyə çalışır. O, həm adi məktəb həyatını davam etdirir, həm də digər ölkələrin qəhrəmanları kimi yeni təhlükələrin qarşısını almaq üçün məsuliyyət daşıyır.

2023-cü il istehsalı olan «Shy [TV-1]» anime serialı «8bit» studiyası tərəfindən ərsəyə gətirilib. 12 seriyadan ibarət layihənin rejissoru Masaomi Ando olub, əsas personajları isə Şino Şimoci, Mamiko Noto, Nao Toyama və Tomokazu Suqita səsləndiriblər.