Phantom [TV]

«İnferno» adlı cinayətkar sindikat ABŞ mafiyasının rəhbərlərini bir-bir aradan qaldırmaq üçün bacarıqlı qatil Fantomdan istifadə edir. Bu amansız icraçının izinə heç kim düşə bilmir, çünki onun hücumlarından sağ çıxan olmur. Lakin ölkəni təkbaşına gəzən yaponiyalı gənc Reyci təsadüfən baş verən qətlin şahidi olur və sindikatın diqqətini çəkir.

Təşkilat nümayəndələri Reycinin ölüm qabağı cəsarətini bəyənərək onun yaddaşını silir və bədənindən muzdlu qatil kimi istifadə etməyə qərar verirlər. Ona Svay kod adı verilir və o, Fantom ləqəbli Ayn adlı qızın rəhbərliyi altında təlimlərə başlayır. İki gənc icraçı keçmişlərini xatırlamasalar da, tədricən oyuncaq olduqlarını başa düşərək gələcək addımları barədə düşünməyə məcbur qalırlar.

«Phantom [TV]» adlı 26 seriyalı anime serialı 2009-cu ildə Bee Train studiyası tərəfindən istehsal edilib. Layihənin rejissor kürsüsündə Koichi Mashimo və Tomoyuki Kurokawa əyləşib. Baş personajları Miyu Irino, Ayahi Takagaki, Akeno Watanabe və Isshin Chiba səsləndirib.