Tokio esperləri

Məktəbli Rinka Uruşiba işsiz atası ilə birlikdə maddi çətinliklər içində gün keçirir. Dərsdən qayıdarkən qız havada sərbəst şəkildə uçan pinqvin və onun yanında süzən parıldayan iri balıqlar görür. Bu qəribə mənzərəyə onunla yanaşı bədəni əziklər içində olan məktəbli bir gənc də şahidlik edir.

Çox keçmədən bu görüntünün xəyal olmadığı üzə çıxır. Rinka bərk cisimlərin içindən maneəsiz keçmək bacarığı qazanır, atası ətrafdakı dəmirləri maqnit kimi özünə çəkir, rastlaşdığı yeni tanışı isə ani olaraq məkanlararası teleportasiya etmək qabiliyyətinə yiyələnir.

Fantastik döyüş janrında çəkilmiş 12 seriyalıq «Tokyo ESP» anime serialı 2014-cü ildə Yaponiyanın «Xebec» studiyası tərəfindən hazırlanıb. Layihənin rejissor kürsüsündə Şigehito Takayanaqi və Yukio Kuroda əyləşib, əsas obrazları isə İbuki Kido və Keysuke Komoto səsləndirib.