Ristorante Paradiso

İllər əvvəl Olqa altı yaşlı qızı Nikolettanı nənəsinin yanında qoyaraq ailəsini tərk etmiş və onunla demək olar ki, maraqlanmamışdı. On beş il sonra Nikoletta anasını axtarmaq üçün Romaya yola düşür. Məlum olur ki, anası bir restoran sahibinə ərə gedib və keçmiş nikahı ilə uşağının olduğunu ərindən gizlədib. Gənc qız bu yalanı üzə çıxarmaq niyyətində olsa da, hadisələr gözlədiyindən fərqli cərəyan edir.

Məkanın mühiti və yaşlı baş ofisiant Klavdionun davranışı Nikolettanın fikrini dəyişir. Qız anasını ələ vermir və onlar hamının yanında sadəcə rəfiqə qızı kimi davranmağa razılaşırlar; əvəzində Olqa onun qalmaq məsələsini həll edir. Nikoletta ofisiantlar Vito və Luçiano, somelye Cici, aşpazlar Teo və Furio ilə tanış olur. Hətta işçilərin eynək taxmaq tərzinin anası tərəfindən düşünüldüyünü öyrənən gənc qız Klavdioya bəslədiyi rəğbət səbəbindən restorana şagird kimi işə düzəlir.

On bir seriyadan ibarət olan «Ristorante Paradiso» anime serialı 2009-cu ildə Yaponiyanın David Production studiyası tərəfindən istehsal edilib. Rejissoru Atsuko Kasedir. Əsas personajları Fumiko Orikasa, Jin Yamanoi, Haruhi Nanao və Kenji Nomura səsləndiriblər.