H2O: Qumda izlər

Anasının faciəvi itkisindən sonra on dörd yaşlı Takuma Hirose yaşadığı böyük sarsıntı səbəbindən görmə qabiliyyətini demək olar ki, tamamilə itirir. Atası vəziyyətin düzələcəyinə ümid edərək oğlunu kənddə yaşayan qardaşının yanına göndərir. Tədricən səhhəti yaxşılaşan yeniyetmə yerli məktəbdə oxumağa başlayır.

Lakin kənd həyatı zahirən göründüyü kimi sakit çıxmır. Məktəbin lideri sayılan qızın başçılığı ilə bütün sinif heç bir günahı olmayan Hayami Kohinatanı sıxışdırır. Takuma təcrid olunmuş bu qıza rəğbət bəsləsə də, tezliklə Hayaminin ailəsinin anasının ölümündə əli olduğunu öyrənir və yenidən ağır psixoloji zərbə alır.

«H2O: Footprints in the Sand» adlı dramatik anime serialı 2008-ci ildə Yaponiyanın «Zexcs» studiyası tərəfindən hazırlanıb. On iki bölümdən ibarət layihəyə Hideki Tatibana və Harume Kosaka rejissorluq edib. Əsas personajları Ami Koşimizu, Harumi Sakurai, Ryoko Tanaka və Mia Naruse səsləndirib.