Beş yarpağın evi

Yaponiyada Edo dövrünün sonları yaxınlaşır və şoqunluq nüfuzunu itirdikcə saysız-hesabsız samuray özünə çörəkpulu axtarır. Bu döyüşçülərin arasında qılınc oynatmaqda usta, lakin həddindən artıq utancaq olan Akitsu Masanosuke də var. Çəkingənliyi üzündən insanlarla ünsiyyət qura bilməyən Akitsu heç cür iş tapa bilmir.

Gözlənilmədən onun qarşısına çıxan sərbəst xarakterli bir gənc samuraya yemək verir və cangüdənlik təklif edir. Düşdüyü çətin vəziyyətdən çıxmaq istəyən döyüşçü təklifi qəbul edir, lakin həmin gəncin «Beş yarpaq» adlı qorxunc dəstənin başçısı olduğundan xəbərsizdir. Cəmi dörd nəfərdən ibarət olan bu qrupa Akitsu beşinci üzv kimi qatılır.

On iki seriyadan ibarət «Sarai-ya Goyou» tarixi dram animesi 2010-cu ildə Yaponiyanın Manglobe studiyası tərəfindən hazırlanıb. Layihənin rejissorluğunu Tomomi Mochizuki və Kosuke Kobayashi həyata keçirib, baş rolları isə Daisuke Namikawa, Takahiro Sakurai, Yuya Uchida və Fuyuka Ono səsləndirib.