Ürəyin pıçıltısı

Tokioda yaşayan on dörd yaşlı Şidzuku boş vaxtlarını kitab oxumaqla və şeir yazmaqla keçirir. Kitabxanadan götürdüyü növbəti kitablarda qəribə bir detala rast gəlir: ondan əvvəl bütün bu nəşrləri Seydzi adlı oğlan oxuyub. Tezliklə həmin şəxsin paralel sinifdə oxuyan və ilk baxışdan onda heç bir xoş təəssürat yaratmayan yeniyetmə olduğu üzə çıxır.

Zaman keçdikcə gənclər bir-birini daha yaxından tanımağa başlayır. Seydzinin skripka ustası olmaq arzusu Şidzukunu da öz həyat yolunu seçməyə sövq edir. O, qədim əşyalar mağazasında gördüyü Baron adlı pişik heykəlciyindən təsirlənərək öz hekayəsini qələmə alır.

«Mimi wo sumaseba» adlı tammetrajlı anime filmi 1995-ci ildə Yaponiyada istehsal olunub. Rejissor Yosifumi Kondonun lentə aldığı melodramada əsas obrazları Yoko Honna, Issey Takahashi, Takashi Tachibana və Shigeru Muroi səsləndirib.