Alatoran

Yuxarı sinif şagirdi Sachi Koyama məktəb kvarteti ilə birlikdə çıxışa hazırlaşır və vaxtını skripka çalmağa həsr edir. O, insanlardan uzaq durmağa çalışan, qapalı bir gəncdir. Hadisələr 2011-ci il zəlzələsinin fəsadlarını hələ də yaşayan Fukuşima prefekturasının İvaki şəhərində cərəyan edir.

Kənd yerlərində gəzintiyə çıxan Sachi burada rəssamlıqla maraqlanan həmyaşıdı Yusuke Kijinami ilə qarşılaşır. Fəlakətin izlərini daşıyan bu gənc oğlanla tanışlıq qızın həyatına yeni ab-hava gətirir. Təbiət qoynundakı təsadüfi görüş yaradıcı baxışlara malik iki yeniyetmənin ünsiyyət qurmasına və bir-birinə yaxınlaşmasına zəmin yaradır.

Tammetrajlı dram janrında çəkilmiş «Alatoran» anime filmi 2019-cu ildə Yaponiyada istehsal olunub. Ekran əsərinin quruluşçu rejissoru Yutaka Yamamoto, əsas personajları səsləndirənlər isə Sora Amamiya, Kaori Fukuhara, Kana Hanazawa və Seishiro Katodur.