Dəyişikliklər fəsli

Boks karyerasında uğur qazana bilməyən və sosial işçi vəzifəsindən ayrılan Oran gecə-gündüz fəaliyyət göstərən mağazada satıcı işləyir. Özünü uğursuz sayan qadının həyatı növbələrin birində dükana çaşqın məktəbli Unun gəlişi ilə dəyişir. Oran gəncə kontraseptiv vasitələrdən düzgün istifadə barədə təmkinlə məsləhət verir. Bu hadisədən sonra oğlan tez-tez mağazaya baş çəkərək dərdlərini bölüşür və qısa müddətdə sevgilisi Paramı da onunla tanış edir.

Gənclərin səmimi etimadı Oranın öz keçmişinə başqa gözlə baxmasına və gələcəyə ümidlə yanaşmasına səbəb olur. Laftel studiyasının 2022-ci ildə təqdim etdiyi 10 seriyalıq «Neulin Jangma» («Dəyişikliklər fəsli») romantik anime-serialı həyatın çətin dövrlərini aşmağa çalışan insanların münasibətlərindən bəhs edir.