Xoşbəxtlik küçəsində

Tayvanda doğulan Çi nəhayət arzusuna çataraq ABŞ-yə köçür. Orada rahat bir evə sahib olur, ofisdə iş tapır və Antoni adlı yerli gənclə ailə qurur. Lakin bir müddət sonra qəribə yuxulardan əziyyət çəkməyə başlayır və çox keçmədən vətənindən sevimli nənəsinin vəfat etdiyi xəbərini alır.

Kədərli xəbəri eşidən qadın dərhal doğma diyarına qayıdır və illər sonra yenidən Xoşbəxtlik küçəsindəki evinə qədəm basır. Dəyişmiş küçələr onda uşaqlıq və gənclik illərinin kövrək xatirələrini oyadır. Xaricdəki həyatının o qədər də mənalı olmadığını anlayan Çi doğma yurdunun ab-havasında özünü dərk etməyə və həqiqi səadətin mənasını axtarmağa çalışır.

Tammetrajlı dram anime filmi «Xoşbəxtlik küçəsində» 2017-ci ildə Tayvanda istehsal olunub. Əsərin rejissoru Sun Sinyin, əsas personajları səsləndirənlər isə Kvay Lunmey, Vey Teşen, Çen Boçjen və Lyao Xueyjendir.