Astro Note

Aşpaz Takumi Miyasaka iş müsahibəsi üçün gəldiyi ünvanın dəbdəbəli restoran əvəzinə köhnə "Astro Lodc" pansionatı olduğunu görür. Məyus olmasına baxmayaraq, o, məharətini göstərir və bişirdiyi yeməklərlə qəribə sakinlərin zövqünü oxşayır. Ev sahibəsi Mira Qotokudzi onun təamlarına heyran qalır, Takumi isə qızın özünə vurulur. Beləliklə, gənc aşpaz beş nömrəli otaqda qalaraq hər səhər yemək hazırlamağa razılaşır.

Bir müddət sonra Takumi Miranın qəribəliklərini sezməyə başlayır. Qız nə müasir texnologiyadan baş çıxarır, nə də ənənəvi yapon mətbəxini tanıyır. Üstəlik, onun otağından arabir naməlum səslər eşidilir. Aşpazın ağlına belə gəlmir ki, aşiq olduğu qadın gizli tapşırıqla uzaq planetdən gəlmiş bir yadplanetlidir.

"Astro Note" fantastika və romantik komediya janrlarında çəkilmiş anime serialıdır. İstehsalı Telecom Animation Film studiyasına məxsus olan ekran əsəri 2024-cü ildə yayımlanıb və 12 seriyadan ibarətdir.