Kerol

Məktəbli qız Kerol evdar qadın və istedadlı musiqiçidən ibarət bir ailədə böyüyür. Son vaxtlar qız qəribə səslər eşitməyə başlayır və naməlum bir varlıq onu adı ilə çağırır, gözünün önündə isə dumanlı görüntülər canlanır. Çox keçmədən ətrafdakı aləmdə də qəribəliklər baş verir: Biq-Ben saatının zəngləri kəsilir, sevimli musiqi qrupu şöhrətini itirir, atasının violonçelindən çıxan səsin pisləşməsi isə ailədə gərginliyə səbəb olur.

Səslərin kimsə tərəfindən oğurlandığını anlayan Kerol bu şübhəsini dəqiqləşdirmək üçün akademiyaya yollanır. O, "Gaball Screen" qrupunun köhnə valını pleyerə qoyduqda musiqinin tamamilə yox olduğunu görür. Həmin an ekrandan saçan parlaq işıq otağı bürüyür və Kerolu Lapas Lupas adlı alternativ ölçüyə aparır. O, burada Klark, Tiko və Fleş ilə birləşərək bədheybətlərin Yer üzündəki musiqini oğurlamasının qarşısını almağa çalışır.

"Kerol" adlı tammetrajlı fantastik anime 1990-cı ildə Yaponiyada istehsal olunub. Rejissor Satoşi Dedzakinin çəkdiyi layihə Magic Bus və animate Film studiyalarının birgə işidir. Əsas personajları Aya Hisakava, Kaneto Şiodzava, Hiroko Sudzuki və Hideyuki Tanaka səsləndirib.