Bədheybətlər şəhəri

İnsan cəmiyyəti ilə yanaşı, fövqəltəbii güclərə malik olan və cildini dəyişə bilən varlıqların yaşadığı Qara dünya gizli şəkildə mövcuddur. Əsrlər boyu iki tərəf arasındakı sülh xüsusi gizli saziş sayəsində qorunub saxlanılıb. İndi isə həmin müqavilənin müddətini uzatmaq vaxtı çatıb, lakin Qara dünyanın aqressiv qruplaşması razılaşmanın baş tutmaması üçün hər cür təxribata əl atır.

Sülhün taleyi fərqli aləmləri təmsil edən iki xüsusi agentin çiyinlərinə düşür. Bu tərəfdaşlar sazişin imzalanmasını təmin etmək üçün radikalların müqavimətini dəf etmək məcburiyyətində qalırlar.

1987-ci ildə Yaponiyada istehsal olunmuş tammetrajlı «Yoju toshi» animesinin rejissoru Yoşiaki Kavaciridir. Qorxu və fentezi janrında olan filmin əsas obrazlarını Yusaku Yara, Toşiko Fucita, İçiro Naqai və Takeşi Aono səsləndiriblər.