Fate/Grand Order: Shinsei Entaku Ryouiki Camelot 2 - Paladin; Agateram

Səyyah cəngavər Bediver 1273-cü ildə Qüdsə çatır, lakin Müqəddəs torpaq yerinə kimsəsiz səhra və didərgin düşmüş insanlarla qarşılaşır. Bu torpaqlar uğrunda üç tərəf mübarizə aparır. Müqəddəs şəhəri və Şir kralı qoruyan Dəyirmi masa cəngavərləri, bütün səltənətini qumlara köçürmüş Günəş kralı Ozimandiya və dağlarda gizlənərək üsyan hazırlayan yersiz-yurdsuz insanların müdafiəçiləri üz-üzə gəlir.

Bediver Şir kralın hüzuruna çıxmaq ümidi ilə Müqəddəs şəhərə doğru irəliləyir. O, bu səfərdə bəşəriyyətin sonuncu ustadı Ritsuka Fucimaru ilə rastlaşır. İnsanlıq tarixini bərpa etmək məqsədilə Qüdsə gələn Ritsukaya sadiq Xidmətçisi Maş yoldaşlıq edir.

Tammetrajlı Yaponiya animesi «Fate/Grand Order: Shinsei Entaku Ryouiki Camelot 2 - Paladin; Agateram» 2021-ci ildə nümayiş olunub. Fantaziya və döyüş janrlarını birləşdirən ekran işinin rejissoru Kazuto Araidir. Əsas personajları Mamoru Miyano, Nobunaga Shimazaki, Rie Takahashi və Miyuki Sawashiro səsləndirib.