Gənc Sarutobi Sasuke

Meşədə böyüyən Sasuke bacısı Oyu ilə birlikdə vəhşi heyvanların əhatəsində günlərini keçirir. Bir gün nəhəng bir qartal meşənin balaca maralına hücum edərək onu dərin gölə atır. Həmin suyun dərinliklərində isə yırtıcı nəhəng salamandra gizlənir və Sasuke heyvanları xilas etmək üçün tələsik suya atılır.

Döyüş zamanı oğlan məğlub olur və su bədheybəti əsl simasını büruzə verir. Məlum olur ki, bu varlıq azadlığa qovuşmuş qəddar ifritə Yakuşadır. Bacısı ifritənin bütün ölkəni xaosa qərq etmək istədiyini bildirdikdə, Sasuke sehr və döyüş sənətini dərindən öyrənmək, düşmənin qarşısını almaq üçün usta axtarışına çıxır.

«Shônen Sarutobi Sasuke» adlı tammetrajlı macəra və fentezi animesi 1959-cu ildə Yaponiyada nümayiş olunub. Layihə Toei Animation studiyası tərəfindən hazırlanıb. Cizgi filminin rejissor kürsüsündə Akira Daikuhara və Taiji Yabushita əyləşib, əsas rolları isə Katsuo Nakamura, Hiroko Sakuramachi, Teruo Miyazaki və Tomoko Matsushima səsləndirib.