Qərbə səyahət

Sehrli bir daşdan cəsur və gənc meymun Son Qoku dünyaya gəlir. Zamanla o, meymunların hökmdarı seçilir və güclü cadugərlik sirlərini mənimsəyir. Lakin əldə etdiyi bacarıqlardan sui-istifadə etməyə başlayan Qoku ətrafına narahatlıq gətirir.

Özündənrazı meymuna yaxşı dərs vermək istəyən tanrılar onu cəzalandırmaq qərarına gəlirlər. O, xüsusi vəzifə daşıyan rahibi müşayiət etmək üçün uzaq bir yola göndərilir. Onların marşrutu bədheybətlər, yamyamlar və təhlükəli iblislərlə dolu qorxulu torpaqlardan keçir.

«Saiyûki» tammetrajlı anime filmi 1960-cı ildə Yaponiyanın Toei Animation studiyasında istehsal olunub. Ekran əsərinin quruluşçu rejissorları Daisaku Shirakawa və Taiji Yabushitadır. «Qokunun macəraları» franşizasına daxil olan layihədə əsas obrazları Kiyoshi Komiyama, Noriko Shindo, Hideo Kinoshita və Setsuo Shinoda səsləndirib.