Qara tülkü

Gənc Rikka İsuruqi iki yaxın qohumunun himayəsində böyüyür. Babası qıza qədim nindza bacarıqlarını öyrədir, tədqiqatçı atası Allen isə süni intellektlə çalışan mülki dronların yaradılması üzərində işləyir.

Rikkanın on altı yaşı tamam olan gün silahlı dəstə yeni texnologiyanı ələ keçirmək məqsədilə onların evinə basqın edir. Atası və babası qətlə yetirilsə də, qız ailəsinin hazırladığı dronlarla birlikdə qaçmağı bacarır. Bir neçə ay sonra o, özəl xəfiyyə kimi fəaliyyət göstərir və gecələr tülkü maskası taxaraq ailəsinin qatillərini axtarmağa başlayır.

2019-cu ildə Yaponiyada istehsal olunmuş «Blackfox» tammetrajlı animesi döyüş və fentezi janrlarını birləşdirir. Ekran əsərinin rejissorları Keisuke Shinohara və Kazuya Nomuradır, əsas rolları isə Ayaka Nanase, Haruka Tomatsu, Yo Taichi və Hiroshi Tsuchida səsləndirib.