Qəhrəmanın komandasında şirin bir qız var idi

Avtomobil qəzasında həyatını itirən baş qəhrəman sehirli bir dünyada yenidən doğulur. Lakin o, şöhrətli bir döyüşçü kimi deyil, İblislər Kralının xidmətində olan güclü bir məxluq qismində oyanır. Şan-şöhrət ardınca qaçmayan gənc əsl qüvvəsini hamıdan gizlədərək qalada sıravi bir keşikçi kimi sakit həyat sürməyə başlayır.

Bir gün qəhrəmanın dəstəsi bu istehkama hücum edəndə hər şey dəyişir. Keşikçi gələn qonaqları asanlıqla məğlub etsə də, onları cəzalandırmaq əvəzinə yaralarını sağaldır və sağ-salamat yola salır. Bunun səbəbi isə rəqiblərin arasında gördüyü keşiş Sesiliya Akvareynə ilk baxışdan vurulmasıdır. Beləliklə, o, qarşı cəbhədə olmasına baxmayaraq hisslərini bu qıza etiraf etmək qərarına gəlir.

«Yuusha Party ni Kawaii Ko ga Ita no de, Kokuhaku Shite Mita.» adlı 13 seriyalı yapon anime serialı Gekkou studiyası tərəfindən hazırlanıb. 2026-cı il istehsalı olan layihənin rejissor kürsüsündə Tomonori Mine və Yasutaka Yamamoto əyləşib. Baş personajları Kana Hanazawa, Kohei Amasaki, Arisa Kiyoto və Akari Miyazaki səsləndirib.