Zenshuu.

Məktəbi bitirdikdən dərhal sonra animasiya studiyasında işə başlayan Natsuko Hirose qısa zamanda karyera quraraq baş rejissor vəzifəsinə yüksəlir. Sehrbaz qızlar haqqında çəkdiyi ilk layihə böyük rəğbət qazanır və hitə çevrilir. Növbəti hədəf ilk məhəbbətdən bəhs edən yeni film olsa da, işlər irəliləmir. Şəxsi həyatında heç vaxt aşiq olmayan Natsuko romantika hissini canlandırmaqda çətinlik çəkir, üstəlik uğursuzluğa düçar olmuş «Tales of Destruction» animesinin rejissorunun ölüm xəbəri vəziyyəti daha da pisləşdirir.

Çıxılmaz vəziyyətə düşən gənc qız vaxtı keçmiş pitsa yedikdən sonra huşunu itirir. Ayıldıqda isə özünü birbaşa «Tales of Destruction» dünyasında tapır. Macəra və fentezi janrında olan «Zenshuu.» anime serialının qəhrəmanı ekranda gördüyü bu qəribə mühitdə sağ qalmağa çalışır.

2025-ci il istehsalı olan Yaponiyanın 12 seriyalı bu anime layihəsi MAPPA studiyası tərəfindən hazırlanıb. Serialın rejissoru Mitsue Yamazaki, əsas rolları səsləndirənlər isə Anna Nagase, Kazuki Ura, Rie Kugimiya və Luci Christiandır.