İgidlik vaxtıdır, qəhrəman!

Döyüş sənəti aləmi keçmişdə Xaosun hücumuna məruz qalarkən ilahi elçinin bəxş etdiyi xüsusi çevrilmə texnikası sayəsində xilas ola bilmişdi. Lakin sonradan idarəolunmaz həddə çatan bu üsul şeytani təriqətin rəhbəri Murong Qionqu məyus etdi və o, kənara çəkilməyə qərar verdi. Onun keçmiş köməkçisi isə texnikanı daha da inkişaf etdirərək döyüşçüləri qorxunc varlıqlara çevirən yeni bir dövr yaratdı.

Əsl döyüş sənətinin şöhrətini geri qaytarmaq istəyən gənc Dongfang Sheng bu dəyişmiş dünyaya qədəm qoyur. O, təcrid olunmuş Murong Qionqu taparaq köhnə nizamı bərpa etməkdən ötrü təcrübəli ustadı ona qoşulmağa razı salır. Beləliklə, iki qəhrəmanın çətinliklərlə dolu ortaq səyahəti başlayır.

Çin istehsalı olan «İgidlik vaxtıdır, qəhrəman!» (Da Xia Qing Shang Gong) adlı döyüş və fentezi janrlı anime serialı 2025-ci ildə BYMENT studiyası tərəfindən hazırlanıb. Layihə 10 seriyadan ibarətdir.