Sənin dalğanda

Tələbə qız Hinako uşaqlığının keçdiyi sahil şəhərinə köçür və burada universitet həyatına başlayır. Yaşayış binasında baş verən yanğın zamanı onu xilasedici Minato xilas edir. Serfinqə olan ortaq maraqları gəncləri bir-birinə bağlayır və onlar arasında dərin məhəbbət yaranır.

Başqalarının həyatını qorumağı özünə borc bilən Minato növbəti xilasetmə zamanı həlak olur. Sevdiyi insanı itirən Hinako bu kədərlə barışa bilmir və dərin sarsıntı keçirir. Çox keçmədən Minato müxtəlif mayelərin içərisində qızın qarşısına çıxaraq yenidən onun həyatına daxil olur.

Tammetrajlı «Kimi to, nami ni noretara» animesi 2019-cu ildə Yaponiyada istehsal edilib. Ekran əsərinin quruluşçu rejissoru Masaaki Yuasadır. Əsas rolların səsləndirilməsini Rina Kawaei, Ryota Katayose və Honoka Matsumoto həyata keçirib.