Gözəl Döyüşçü Seylor Mun R: Təhlükəli Çiçəklər

Tokio şəhəri insanların enerjisini sovuran Qlisiniya adlı qəribə çiçək bədheybətinin hücumuna məruz qalır. Müdafiəçi döyüşçülər ilk təhlükəni dəf etsələr də, qəfildən nəhəng Ksenian çiçəyi ilə gələn yadplanetli Fiore peyda olur. Seylor Muna edilən hücumun qarşısını almaq istəyən Taksedo Mask zərbəni öz üzərinə götürərək yaralanır. Fiore isə uşaqlıqdan tanıdığı Mamorunu sağaltmaq bəhanəsi ilə Yerə doğru yaxınlaşan asteroidə aparır.

Keçmişdə Mamorunun ona bağışladığı qızılgülün əvəzini çıxmaq istəyən yadplanetli uzun müddət qalaktikada axtarış aparıb. Lakin tapdığı təhlükəli bitki onun düşüncələrini ələ keçirərək Fioreni insanların Mamoruya yalnız kədər gətirdiyinə inandırıb. İndi o, bütün planetə enerji soran güllər səpərək bəşəriyyəti məhv etmək niyyətindədir. Qəhrəman qızlar dostlarını xilas etmək və təhlükəni sovuşdurmaq üçün açıq kosmosa yollanırlar.

«Bishoujo Senshi Sailor Moon R: The Movie» adlı tammetrajlı anime filmi 1993-cü ildə Yaponiyada istehsal olunub. Ekran işinin quruluşçu rejissoru Kunihiko İkuharadır. Əsas personajları Kotono Mitsuishi, Toru Furuya, Michie Tomizawa və Aya Hisakawa səsləndiriblər.