Rəngarəng Dünyanın Sabahından

Sehirbazlar ailəsindən olan on yeddi yaşlı Hitomi Tsukişiro sehrin demək olar ki, tükəndiyi Naqasaki şəhərində yaşayır. Uşaq ikən rəngləri ayırd etmək qabiliyyətini itirən qız tədricən duyğularını da itirib və sahib olduğu güc ona heç bir təsəlli vermir. Nəvəsinin gələcəyindən narahat olan cadugər nənəsi Kohaku onu keçmişə — özünün məktəbli olduğu 2018-ci ilə göndərir.

Öz həmyaşıdı olan gənc nənəsi ilə qarşılaşan Hitomi məktəbin incəsənət və fotoqrafiya klubunun üzvləri ilə vaxt keçirməyə başlayır. Yeni tanışlıqlar və dərnək mühiti qıza daxili rahatlıq tapmaqda, şəxsiyyət kimi inkişaf etməkdə və sehrin dəyərini anlamaqda dəstək olur.

2018-ci il istehsalı olan «Irozuku Sekai no Ashita kara» animesi 13 seriyadan ibarətdir və Yaponiyanın «P.A. Works» studiyası tərəfindən hazırlanıb. Rejissoru Toşiya Şinohara olan serialın baş qəhrəmanlarını Şoya Çiba, Kaede Hondo, Sumi Şimamoto və Kaori İşihara səsləndirib.