Hökmdar [TV-3]

Məşhur "İqqdrasil" onlayn oyunu fəaliyyətini dayandırmaq üzrədir. Tünd qüvvələr gildiyasının başçısı olan Momonqa adlı oyunçu sevimli dünyası ilə dərhal vidalaşmaq istəmir və serverlərin tam sönməsini taxtında, nökərlərinin əhatəsində gözləyir. Lakin vaxt başa çatdıqda əlaqə kəsilmir: oyunçu qüdrətli sehrbaz-skeletə çevrilir, proqramlaşdırılmış qeyri-oyunçu personajlar isə canlı insanlar kimi duyğular büruzə verməyə başlayır.

Əsl reallıqdan təcrid olunan və heç bir məlumatı olmayan qəhrəman tamamilə tək qalır. Başına gələnlərin səbəbini öyrənmək və geriyə yol tapmaq məqsədilə Momonqa qarşısına çıxan bu yeni dünyanı fəth etmək qərarına gəlir.

"Hökmdar" franşizasının 13 seriyalıq bu üçüncü mövsümü 2018-ci ildə Yaponiyanın "Madhouse" studiyası tərəfindən çəkilib. Rejissor kürsüsündə Masaki Matsumura və Kunio Vakabayaşi əyləşib, əsas obrazları isə Satoşi Hino, Yumi Hara, Masayuki Kato və Sumire Uesaka səsləndirib.