Sən dadlısan?

Təsadüfən tapılmış yumurta ot yeyən dinozavrın həyatını tamamilə dəyişir. Yumurtadan çıxan bala yırtıcı olsa da, ana onu tərk etmir, Hart adlandırır və öz övladı ilə birlikdə böyüdür. Yaşa dolduqca ət olmadan yaşaya bilməyəcəyini anlayan balaca yırtıcı ailəsini tərk edib uzaqlara qaçmaq məcburiyyətində qalır.

İllər sonra güclü bir ovçuya çevrilən Hart başqa növə aid tənha bir yumurta tapır. Dünyaya indicə göz açan körpə ona çox dadlı görünsə də, balaca onu atası zənn edir və eşitdiyi sözü özünə ad götürərək Umaso olur. Körpəni yeməyə ürəyi gəlməyən Hart, nə vaxtsa anasının etdiyi kimi, təbiətin sərt qanunlarına rəğmən onu böyütməyə qərar verir.

2010-cu il istehsalı olan «Omae Umasou da na» tammetrajlı uşaq macəra animesi Yaponiyanın «Ajia-do» studiyası tərəfindən ərsəyə gətirilib. Filmin rejissoru Masaya Fujimori, baş qəhrəmanları səsləndirən aktyorlar isə Tomoyo Harada, Seishiro Kato, Kappei Yamaguchi və Rikako Aikawadır.