Karin

Karin Marker vampir ailəsində doğulsa da, qohumlarından tamamilə fərqlənir. Günəş şüaları ona heç bir zərər yetirmir, zülmətdə isə o, yolu çətinliklə tapır. Qız adi insanlar kimi məktəbə getməyi sevir və vampirlər kimi dişlədiyi şəxslərin yaddaşını silməyi bacarmır.

Ən böyük problem isə Karinin orqanizminin qan tələb etməməsi, əksinə, onu həddindən artıq çox istehsal etməsidir. Cazibədar bir oğlan və ya potensial qurban gördükdə həyəcanlanan gənc qızın burnundan dərhal qan açılır və bu hal onun gündəlik həyatını çətinləşdirir.

Romantik komediya janrındakı 24 seriyalıq «Karin» anime serialı 2005-ci ildə Yaponiyanın J.C.Staff studiyasında hazırlanıb. Layihənin rejissor kürsüsündə Şiniçiro Kimura və Koichi Sasaki əyləşib, əsas obrazları isə Sayuri Yahagi və Katsuyuki Konishi səsləndirib.