Cütlükdən çox, sevgilidən az

Adi bir yapon məktəbində şagirdlər üçün qeyri-adi təcrübə dərsi tətbiq olunur. Gəncləri ailə həyatına hazırlamaq məqsədilə onları cütlüklərə bölərək xüsusi mənzillərdə birgə yaşamağa göndərirlər. Evdə quraşdırılmış müşahidə kameraları gənclərin ər-arvad kimi necə yola getdiyini qeydə alır və buna əsasən onların reytinq xalları hesablanır.

Ciro Yakuin bu layihədə uşaqlıqdan bəri sevdiyi rəfiqəsi Şiori Sakurazaka ilə birlikdə yaşamaq arzusunda idi. Lakin sistem onun qismətinə tam əks xarakterli, diqqət mərkəzində olan Akari Vatanabeni çıxarır. Məktəbin ən populyar oğlanı Minami Tencinlə eyni evə düşməyi gözləyən Akari də bu qərardan narazı qalır. Qaydalara görə reytinq cədvəlində ilk onluğa girən iştirakçılar tərəfdaşını dəyişə bildiyi üçün onlar birləşib ən yüksək xalları toplamaq qərarına gəlirlər.

«Fuufu Ijou, Koibito Miman.» adlı 2022-ci il istehsalı olan bu romantik komediya anime serialı Yaponiyanın «studio MOTHER» studiyası tərəfindən hazırlanıb. Cəmi 12 seriyadan ibarət layihənin rejissor kürsüsündə Takao Kato və Cuniçi Yamamoto əyləşib.