Ouran Koukou Host Club

Zəhmətkeş və dərslərində uğurlu olan Haruhi adlı qız imkanlı ailələrin övladlarının oxuduğu nüfuzlu məktəbə qəbul olur. Ətrafındakı zəngin tələbələrin səs-küyündən uzaqlaşmaq istəyən gənc qız sakit bir guşə axtarır. Bu məqsədlə musiqi otağına daxil olan Haruhi təsadüfən dəyəri səkkiz milyon yen olan qədim bir vazanı sındırır.

Kasıb ailədən gələn Haruhinin belə böyük məbləği ödəməyə imkanı çatmır. Həmin otaqda fəaliyyət göstərən məktəb qonaqlama klubunun üzvləri ona borcu bağlamaq üçün maraqlı bir yol təklif edirlər. Nəticədə qız klubun heyətinə qoşulmalı və zərəri əməyi ilə ödəməli olur.

2006-cı ildə Yaponiyanın Bones studiyası tərəfindən istehsal edilən bu anime serialı 26 bölümdən ibarətdir. Ekran əsərinin quruluşçu rejissorları Takuya Igarashi və Yu Nobutadır. Əsas qəhrəmanları Maaya Sakamoto, Mamoru Miyano, Masaya Matsukaze və Kenichi Suzumura səsləndirib.