Mangaçı qızlar

On beş yaşlı Kaoruko Moeta həmyaşıdlarından fərqli olaraq vaxtını manqa çəkməyə sərf edir. Böyük səylərinə baxmayaraq, onun işləri oxucuların rəğbətini qazana bilmir və sorğularda sonuncu pillələrdə qalır. Belə uğursuzluqdan sonra qız bu sahədən uzaqlaşmaq istəsə də, redaktoru ona həvəskar rəssamlar üçün nəzərdə tutulmuş xüsusi yataqxanaya köçməyi məsləhət görür.

İlk baxışdan qəribə görünən bu məkanda Kaoruko qısa zamanda yeni dostlar tapır. O, Koyume Koyzuka, Ruki İrokava və Tsubasa Katsuki ilə dil taparaq dostluq mövzusunda ortaq bir manqa hazırlamaq qərarına gəlir. Dörd gənc müəllif birgə layihəni tamamlamaq üçün güclərini birləşdirir.

«Comic Girls» adlı 12 seriyalı komediya animesi 2018-ci ildə Yaponiyanın «Nexus» studiyası tərəfindən istehsal olunub. Rejissor kürsüsündə Yoshinobu Tokumoto və Usaku Myochin əyləşib, əsas obrazları isə Hikaru Akao, Kaede Hondo, Saori Onishi və Rie Takahashi səsləndirib.