Somanın kulinariya döyüşləri [TV-2]

Gənc Somanın ən böyük arzusu atasının restoranında baş aşpaz olmaq və kulinariya bacarıqlarında onu geridə qoymaq idi. Lakin o, orta məktəbi bitirən kimi atası Cuitiro yeməkxananı bağlayaraq ABŞ-yə yola düşür. Atasının gedişqabağı atdığı meydan oxuma gəncin qəlbindəki mübarizə əzmini yenidən alovlandırır.

İndi o, tələbələrinin cəmi on faizinin məzun ola bildiyi ən yüksək səviyyəli kulinariya məktəbində təhsilini salamat başa vurmağa çalışır. «Shokugeki no Souma: Ni no Sara» anime-serialı qəhrəmanın çətin sınaqlarla dolu tələbəlik macəralarını diqqət mərkəzində saxlayır.

J.C.Staff studiyasının hazırladığı 13 seriyalıq Yaponiya istehsalı layihə 2016-cı ildə yayımlanıb. Ekran işinə Yoşitomo Yonetani və Mitsutoşi Sato rəhbərlik edib, baş rolları isə Yoşitsuqu Matsuoka, Minami Takahaşi, Hisako Kanemoto və Maya Uçida səsləndirib.