Tərsinə çevrilmiş Patema: Və yeni gün gəldi

Dərin yeraltı məkanda saysız-hesabsız tunellərdən ibarət bütöv bir məskən yerləşir. Xüsusi qoruyucu geyimlər geyinən sakinlər qaranlıq və qapalı keçidlərdə sakit bir ömür sürürlər. Yeraltı kəndin şahzadəsi olan gənc Patema isə bu sirli keçidləri araşdırmağı hər şeydən çox sevir.

Qızın ən sevimli məkanı sadə insanların ayaq basması qadağan edilən «təhlükəli zona» hesab olunur. Qınaqlara və xəbərdarlıqlara baxmayaraq, marağına üstün gələ bilməyən Patema oranın həqiqətən təhlükəli olub-olmadığını öyrənməyə can atır. Növbəti gəzintilərin birində onunla gözlənilməz hadisə baş verir və böyük sirlər üzə çıxır.

«Sakasama no Patema» adlı 4 seriyalı fantastik anime serialı 2012-ci ildə Yaponiyada nümayiş olunub. Ekran əsərini rejissor Yasuhiro Yoshiura lentə alıb, istehsalı isə Studio Rikka və Purple Cow Studio Japan şirkətləri həyata keçirib. Baş rolları Yukiyo Fujii, Nobuhiko Okamoto və Hiroki Yasumoto səsləndiriblər.