W'z

Yukiya kiçik yaşlarından haus janrında musiqi bəstələyir və həyatını birdəfəlik bu sənətlə bağlamağı planlaşdırır. O, musiqi təmayüllü akademiyaya qəbul olmaq istəsə də, açıq qapı gününün tarixini səhv salır. Yolda rəfiqəsi Haruka ilə rastlaşan gənc, canlı yayımlarının populyar olmamasından gileylənir və qız ona izləyici sayını artırmaq üçün fərqli bir üsul tövsiyə edir.

Yukiyanın başqa bir insanın əlindən tutaraq paralel ölçüyə keçmək kimi qeyri-adi bacarığı var. Şəxsi qaydalarını bir kənara qoyan oğlan Harukanın əlini tutur və onlar şəhərin mərkəzindən digər dünyaya keçərək oradan canlı yayım açırlar. Bu addım hər iki gəncin həyatında tamamilə yeni səhifə açır.

«W'z» anime serialı 2019-cu ildə Yaponiyanın «GoHands» studiyası tərəfindən ərsəyə gətirilib və «Hand Shakers» franşizasının tərkib hissəsidir. Cəmi 13 seriyadan ibarət olan layihənin rejissor kürsüsündə Hiromitsu Kanazawa və Shingo Suzuki əyləşib.