Pokahontas

Avropadan Yeni Dünyaya doğru yola çıxan gəmi heyəti naməlum torpaqlara, macəralara və var-dövlətə doğru üzür. Səyahətçilər arasında Con Smit də var. Ekspedisiyanın rəhbəri isə heyəti gələcək uğurlarla həvəsləndirsə də, onun əsas hədəfi bu torpaqlarda qızıl tapmaqdır.

Amerika sahillərinə yan alan yadellilər burada yerli hindularla qarşılaşırlar. Hadisələrin davamında bu qəbilənin nəcib şahzadəsi Pokahontas ilə yeni gələnlərin yolları kəsişir və iki fərqli tərəf bir-biri ilə üz-üzə qalır.

«Pokahontas» cizgi filmi 1995-ci ildə ABŞ və Yaponiya istehsalı olaraq ekranlara çıxıb. Ekran əsərinin quruluşçu rejissorları Mayk Qebriel və Erik Qoldberqdir, personajları isə Mel Qibson, Kristian Beyl, Cudi Kun və Co Beyker səsləndirib.