Hiyləgər Koyot

Yol Qaçışçısını tutmaq üçün istifadə edilən bütün qurğular, bombalar və raketlər hər zaman Koyotun öz əleyhinə işləyib. «AKME» şirkətinin nasaz məhsullarından illərdir zərər çəkən qəhrəman nəhayət hüquqi yola əl atmaq qərarına gəlir. İnsanların arasına düşən animasiya personajı özünə vəkil tutur və istehsalçı firmaya qarşı rəsmi şikayət qaldırır.

Artıq səhralardakı qovhaqov yerini məhkəmə zallarındakı gərgin çəkişməyə verir. Şirkətin mənafeyini isə ədaləti yox, ancaq qazancı düşünən amansız hüquqşünas Baddi Kreyn qoruyur. Koyot qarşısındakı bu güclü korporativ mexanizmə qarşı öz haqqını sübut etməyə çalışır.

ABŞ istehsalı olan «Hiyləgər Koyot» (Coyote vs. Acme) adlı ailəvi macəra cizgi filminin rejissoru Deyv Qrindir. 2026-cı il layihəsinin əsas rollarında Uill Forte, Con Sina, Lana Kondor və Toni Bell yer alıb.