Avatar: Sonuncu Hava Sehirbazı

Dünya dörd fərqli xalq arasında bölünmüşdü: Su tayfaları, Torpaq krallığı, Hava köçəriləri və Od milləti. Hər bir toplumun nümayəndələri öz təbii ünsürünü idarə edə bilsə də, yalnız dörd ünsürün hamısına hökm edən Avatar xalqlar arasında nizamı qoruyurdu. Lakin Od Hökmdarı digər torpaqları özünə tabe etmək məqsədilə müharibəyə başladıqda həmin tarazlıq pozuldu.

Bütün dünyanın xilası Hava sehrbazı olan on iki yaşlı Aanq adlı uşağın üzərinə düşür. Özünün Avatar olduğunu öyrənən balaca qəhrəman Su tayfasından olan dostları Katara və Sokka ilə birgə səfərə çıxır. Müharibəni dayandırmaq və Od Hökmdarına qalib gəlmək üçün Aanq qorxularına üstün gəlməli və qalan digər ünsürləri idarə etməyi öyrənməlidir.

«Avatar: The Last Airbender» cizgi serialı ABŞ və Cənubi Koreya istehsalıdır və ümumilikdə üç mövsümdən ibarətdir. Ekran əsərinin rejissorluğunu Cankarlo Volpe və Etan Spoldinq etmiş, baş qəhrəmanları isə Zak Tayler Eysen, Mey Uitman, Cek De Sena və Cessi Flauer səsləndirmişlər.