Çao, Alberto

Lukanın gedişindən sonra Alberto sahil qəsəbəsində azdanışan, cüssəli balıqçı Massimo ilə birgə yaşamağa başlayır. Həyatından tam razı olan oğlan vaxtını həm əyləncəyə sərf edir, həm də ev işlərində kömək göstərir. Onun əsas istəyi bu sərt xasiyyətli kişiyə öz bacarığını sübut etməkdir.

«Ciao Alberto» qısametrajlı cizgi filmi bir damın altında yaşayan bu iki fərqli xarakterin münasibətlərindən bəhs edir. Hər vəchlə böyük təsir bağışlamağa çalışan balaca qəhrəman tez-tez komik vəziyyətlərə düşür. Hər addımda özünü təsdiqləmək cəhdləri növbəti məzəli hadisələrlə nəticələnir.

2021-ci ildə ABŞ-da çəkilmiş ailəvi komediyanın rejissoru Makkenna Harrisdir. Əsas personajları Cek Dilan Qreyzer, Marko Barriçelli və Ceykob Tremble səsləndirib.