Nəhəng armud haqqında inanılmaz hekayə

Balaca fil Sebastian və pişik Mitço dəniz sahilində yerləşən sakit Günəşli şəhərdə yaşayırlar. Bir gün dostlar sahildən içində məktub olan sirli şüşə tapırlar. Bu məktub itkin düşmüş şəhər merindən gəlmişdi və o, Gizli adadan xilas edilməsini xahiş edirdi. Şüşədə məktubla yanaşı balaca toxum da var idi və dostlar onu torpağa əkirlər. Səhəri gün isə həmin toxumdan nəhəng bir armud böyüyür.

Yoldaşlar həmin nəhəng meyvəni gəmiyə çevirərək professor Qlükoza ilə birlikdə dənizə açılmaq qərarına gəlirlər. İtmiş meri xilas etmək üçün yola çıxan qəhrəmanları qabaqda dəniz quldurları, əjdaha və qorxunc xəyallarla dolu sınaqlar gözləyir.

Danimarka istehsalı olan «Nəhəng armud haqqında inanılmaz hekayə» animasiya filmi 2017-ci ildə nümayiş olunub. Ekran əsərinin quruluşçu rejissorları Amaliya Nesbü Fik və Yurgen Lerdamdır. Əsas personajları Liva Elvira Maqnussen, Peter Frödin və Henrik Koyfoed səsləndiriblər.