SamSam

Balaca qəhrəmanın doğma məkanı ciddi təhlükə ilə üz-üzə qalır. Kainata qəm-qüssə yayan Qaranlıqlar adlı yadplanetli böcəklər qəfildən SamPlanetə hücum edirlər. «SamSam» cizgi filmi doğma yurdun bu qəribə bəladan qurtulması yolunda atılan addımları əks etdirir.

Böcək dəstələrinə təkbaşına qalib gəlmək o qədər də asan məsələ deyil. Baş qəhrəmanın köməyinə qonşu planetdən olan və uzun müddət yazışdığı köhnə rəfiqəsi gəlir. İki yoldaş birləşərək kədər saçan bu canlıların qarşısını almağa çalışır.

Fransa və Belçika istehsalı olan bu ailəvi macəra filmi 2019-cu ildə işıq üzü görüb. Ekran əsərinin quruluşçu rejissoru Tanqi de Kermeldir. Əsas obrazları İsaak Lobe-Lebel, Lior Şabba, Jeremi Prevo və Sebastyan Deju səsləndiriblər.