Dənizin nəğməsi

On yaşlı Ben atası Konor və balaca bacısı Şirşa ilə birlikdə adadakı mayakda böyüyür. Şirşa heç vaxt danışmır, lakin çox keçmədən onun altı il əvvəl yoxa çıxmış anası kimi qədim dəniz xalqı olan selki soyundan gəldiyi məlum olur.

Uşaqların təhlükəsizliyindən qorxan ata onları şəhərə, nənələrinin yanına göndərmək qərarına gəlir. Doğma məkandan uzaq düşən Ben geriyə qaçmaq istəyir, Şirşanı isə doğma su dalğaları özünə çəkir. Beləliklə, bacı və qardaş adaya qayıtmaq üçün müxtəlif hadisələrlə dolu çətin bir səfərə başlayırlar.

«Song of the Sea» cizgi filmi 2014-cü ildə İrlandiya, Danimarka, Belçika, Fransa və Lüksemburq kinoşirkətlərinin birgə istehsalı kimi təqdim edilmişdir. Ekran əsərinin quruluşçu rejissoru Tomm Murdur, baş rolların səsləndirilməsində Devid Roul, Brendan Qlison, Liza Hanniqan və Finola Flanaqan iştirak etmişdir. Bu layihə rejissorun məşhur İrlandiya folklor trilogiyasının bir hissəsidir.