Ebbi Hetçer

Yeddiyaşlı qızcığaz qeyri-adi tüklü canlıların da məskunlaşdığı bir mühitdə böyüyür. Bu qəribə məxluqlar ölçülərini və formalarını dəyişə, bəzən isə tamamilə gözəgörünməz ola bilirlər. Balaca qəhrəman nikbinliyini heç vaxt itirmir və onlarla tez bir zamanda ümumi dil tapır.

Qəribə dostlar tez-tez müxtəlif problemlərlə üzləşir və öz duyğularını düzgün ifadə etməkdə çətinlik çəkirlər. «Abby Hatcher» cizgi serialı qızın həmin canlılara dəstək olmasından, çətin anlarda onlara yol göstərməsindən bəhs edir.

ABŞ və Kanada istehsalı olan bu layihə rejissor Kiran Kelli tərəfindən ərsəyə gətirilib. Əsas obrazları Cozett Xorxe, Meysi Druen, Ceykob Soli və Laiba Alvi səsləndirib. 2018-ci ildə başlayan animasiya seriyası 3 mövsümdən ibarətdir.