Tom və Cerri: Nəhəng macəra

«Nağıllar şəhəri» adlı əyləncə parkı bağlanmaq təhlükəsi ilə üz-üzə qalır. Buranı acgöz milyarderin əlindən qurtarmaq istəyən Cek adlı oğlan sevimli heyvanları Tom və Cerri ilə birlikdə çıxış yolu axtarır. Onlar kömək naminə ailənin buzovunu sehirli lobya dənələrinə dəyişməyə qərar verirlər.

Əkilən lobyadan göyün üzünə ucalan nəhəng gövdə dostları buludların üstündəki sehrli ölkəyə aparır. Həmin diyarda acgöz nəhəng hökmranlıq edir, həmçinin Drupı, Spayk və Qaz Ana kimi qəhrəmanlar yaşayır. Əyləncə parkını xilas etmək üçün pişik və siçan aralarındakı daimi çəkişmələri bir kənara qoymalı olurlar.

«Tom və Cerri: Nəhəng macəra» adlı bu animasiya filmi 2013-cü ildə ABŞ-da istehsal olunub. Rejissorlar Spayk Brandt və Toni Çervonenin lentə aldığı ailəvi komediyada personajları Con Di Macio, Ceykob Bertran, Fil LaMarr və Qrey Qriffin səsləndiriblər.