Cəngəllik keşikçiləri

Pələng zolaqlarına sahib pinqvin Moris özünün əsl pələng olduğuna və meşəni qorumaq üçün doğulduğuna inanır. O, fərqli heyvanlardan ibarət «Cəngəllik keşikçiləri» adlı dəstə toplayaraq ərazidə əmin-amanlığı qorumağa çalışır. Bu iş hər dəfə asan başa gəlməsə də, komanda təslim olmur və qayda-qanunun keşiyində durur.

Tezliklə meşə sakinlərinin rahatlığı ciddi təhlükə ilə üzləşir. Hiyləgər koala İqor o qədər də fərasətli olmayan babunlardan ibarət ordusu ilə təhlükəli planlarını həyata keçirməyə başlayır. Moris və onun dostları vəhşi təbiəti xilas etmək naminə bu amansız rəqiblə qarşı-qarşıya gəlməli olurlar.

«Les as de la jungle» animasiya filmi 2017-ci ildə Fransada istehsal olunub. Ekran əsərinin quruluşçu rejissorları David Alo və Erik Tostidir, əsas obrazları isə Loran Morto, Lüsiyen Doc, Kit Silverşteyn və Filipp Bozo səsləndiriblər.