Daşdakı qılınc

Londonun mərkəzində içərisinə qədim silah yerləşdirilmiş nəhəng bir qaya parçası peyda olur. Qızılı yazı xəbər verir ki, tilsimli qılıncı oradan yalnız İngiltərənin gələcək həqiqi hökmdarı çıxara bilər. Lakin uzun müddət heç kim bu tapşırığın öhdəsindən gələ bilmir.

Meşə kənarındakı qəsrdə qulluqçuluq edən on bir yaşlı Artur isə öz gələcək taleyindən tamamilə xəbərsizdir. Yaxınlıqda məskən salan sehrbaz Merlin və onun savadlı bayquşu Arximed uşağın tərbiyəsini öz üzərlərinə götürürlər. Müdrik sehirbaz Arturu balığa, sincaba və quşa çevirərək müxtəlif sınaqlardan keçirir, ona əsl gücün qollarda deyil, bilik və ağılda olduğunu aşılayır.

1963-cü ildə istehsal olunmuş «The Sword in the Stone» cizgi filmi Walt Disney Animation Studios tərəfindən ərsəyə gətirilib. Ekran əsərinin rejissorları Volfqanq Rayterman və Klayd Ceronimidir, əsas obrazları isə Sebastyan Kabot, Karl Svenson, Rikki Sorensen və Cunios Metüz səsləndiriblər.