İrəli

Texnoloji inkişaf sehrli qüvvələri arxa plana atdıqdan sonra nağıl personajları müasir cihazlardan və maşınlardan istifadə etməyə başlayıblar. Elf qardaşları İan və Barli Laytfut atalarını uşaq ikən itiriblər və analarının himayəsində böyüyüblər. On altı yaşı tamam olan İana atadan qalan sehrli əsa və onu cəmi bir günlüyə geri qaytara biləcək xüsusi ovsun təqdim edilir.

Sehr tam baş tutmur və tələb olunan daş yox olduğu üçün atalarının yalnız ayaqları peyda olur. Qalan hissəni tamamlamaq və vaxt bitmədən atanı bütöv görmək üçün qardaşlar yeni sehrli daş axtarışına çıxırlar. Qədim rəvayətlərə bələd olan Barli və qardaşı İan yarımçıq ata ilə birlikdə maraqlı səfərə yollanırlar.

«Onward» animasiya filminin quruluşçu rejissoru Den Skenlondur. Əsas personajları Tom Holland, Kris Pratt, Culiya Lui-Dreyfus və Oktaviya Spenser səsləndiriblər. ABŞ və Yaponiya istehsalı olan bu ekran əsəri 2020-ci ildə nümayiş olunub.