Ruben Brandt, kolleksiyaçı

Təcrübəli psixoanalitik Ruben Brandt cinayətkarları sağaltmaqda usta olsa da, hər gecə eyni dəhşətli yuxuların əsirinə çevrilir. O, bu vəziyyətdən yeganə çıxış yolunu dünyanın ən məşhur muzeylərində qorunan on üç sənət əsərini ələ keçirməkdə görür. Həkim özünə müraciət edən dörd pasiyentindən dəstə toplayaraq Luvr, Teyt, Ermitaj və Nyu-York Müasir İncəsənət Muzeyində silsilə oğurluqlar planlaşdırır.

Qısa müddətdə qlobal axtarışa verilən Ruben cinayət aləminin ən çox təqib edilən simasına çevrilir. Yüz milyon dollarlıq mükafatın ardınca düşən polislər, italyan mafiyası və rus qanqsterləri onun izinə düşür. Lakin Brandtın qarşısındakı ən təhlükəli rəqib sığorta şirkətləri üçün çalışan xüsusi xəfiyyə Mayk Kovalskidir.

Macarıstan istehsalı olan «Ruben Brandt, kolleksiyaçı» adlı cizgi filmi 2018-ci ildə rejissor Milorad Krstic tərəfindən çəkilib. Baş rolların səsləndirilməsində İvan Kamaraş, Qabriella Hamori və Zalan Makrançi iştirak ediblər.